★蜜斯艾莉の宅戲劇生活★

韓國男神金秀賢主演嘅劇集《製作人們》落實會喺10月喺日本播出，而金秀賢昨日就專誠飛去東京出席今晚舉行嘅粉絲見面會，順道宣傳劇集，吸引1,600名粉絲力撐。

金秀賢着住黑色西裝外套加白色T恤出場，仲演唱佢曾經喺劇集入面唱畀暗戀對象孔孝真聽嘅情歌《姐姐你是我的女人》，現場粉絲即時大叫。

活動上，佢亦有同粉絲交流，大呻拍攝《製作人們》最可惜嘅係冇時間同眾拍檔好好咁傾計，又話如果有女朋友的話，絕對唔介意為對方拎手袋。

而金秀賢仲喺台上化身甜品師傅整刨冰畀粉絲，邀請三個粉絲品嚐下佢嘅愛心刨冰，喺戴圍裙嘅時候，金秀賢仲笑笑口咁話：「我有啲緊張，我係咪真係適合戴圍裙？」

不過唔知金秀賢係玩粉絲定錫粉絲，除咗喺刨冰上面淋蜜糖，放朱古力、棉花糖之外，仲加埋茄汁、辣醬同wasabi，睇到大家眼都凸埋。

整整下，金秀賢仲無啦啦匿埋，唔畀現場攝影師影佢，仲一路整一路咆哮，似乎好唔滿意自己嘅「傑作」。到粉絲食刨冰嘅時候，都忍唔住做出一個好似想喊嘅樣咁，金秀賢自己試食時都表現難受。

期後金秀賢再請三位粉絲上台玩打保齡球遊戲，仲話自己好鐘意打保齡球，即場做咗個保齡球嘅甫士。

最後金秀賢仲唱咗佢首代表歌曲、劇集《星夢高飛》嘅歌曲《Dreaming》完場。